बारामती : 'माझे मत, माझा अधिकार' आणि 'लोकशाही बळकटीकरण' हाच खरा मंत्र मानून बारामती विधानसभा पोटनिवडणूक २०२६ च्या पार्श्वभूमीवर शहरात मोठे जनमत तयार होताना दिसत आहे. याचाच एक भाग म्हणून, अनेकांत एज्युकेशन सोसायटीच्या तुळजाराम चतुरचंद (टी. सी.) महाविद्यालय आणि अनेकांत फार्मसी महाविद्यालय या दोन्ही ठिकाणी मतदार जनजागृतीसाठी विशेष कार्यक्रमाचे आयोजन करण्यात आले होते. या कार्यक्रमात सुमारे २५० विद्यार्थ्यांनी उत्स्फूर्तपणे सहभागी होत मतदानाची शपथ घेतली.
ही जनजागृती मोहीम निवडणूक निर्णय अधिकारी उत्तम दिघे आणि सहायक निवडणूक निर्णय अधिकारी स्वप्नील रावडे यांच्या मार्गदर्शनाखाली राबविली जात आहे. बारामती तालुका मतदान प्रचार-प्रसिद्धी प्रमुख सौ. सविता खारतोडे यांनी या प्रसंगी विद्यार्थ्यांना संबोधित केले. त्यांनी लोकशाहीतील मतदानाचे महत्त्व विशद करताना सांगितले की, "तरुणांचे एक मत केवळ प्रतिनिधी निवडत नाही, तर देशाच्या भविष्याची दिशा ठरवते. त्यामुळे प्रत्येक पात्र विद्यार्थ्याने मतदार नोंदणी करून मतदानाचा हक्क बजावणे ही काळाची गरज आहे."
या उपक्रमात विद्यार्थ्यांसोबतच प्राध्यापक आणि कर्मचाऱ्यांनीही मोठ्या संख्येने सहभाग नोंदवला. महाविद्यालयाचे प्राचार्य डॉ. अविनाश जगताप, डॉ. दर्शन शहा आणि परीक्षा विभाग प्रमुख डॉ. वैशाली पाटील यांनी उपस्थित राहून विद्यार्थ्यांचे कौतुक केले.
२५० हून अधिक विद्यार्थ्यांनी 'निर्भयपणे आणि कोणाच्याही प्रलोभनाला बळी न पडता' मतदान करण्याची शपथ घेतली.
विद्यार्थ्यांना मतदान यंत्र (EVM), व्हीव्हीपॅट (VVPAT) आणि मतदार यादीतील नाव तपासणी याविषयी सविस्तर माहिती देण्यात आली.
पहिल्यांदाच मतदान करणाऱ्या (First-time Voters) विद्यार्थ्यांमध्ये या उपक्रमामुळे मोठा उत्साह दिसून आला.
पोटनिवडणुकीच्या या रणधुमाळीत प्रशासनाकडून सुरू असलेल्या अशा उपक्रमांमुळे मतदानाचा टक्का वाढण्यास मदत होईल, असा विश्वास यावेळी व्यक्त करण्यात आला.
Post a Comment