रुपाली चाकणकर यांना 'सेक्स रॅकेट'च्या सूत्रधार म्हणून आरोपी करा, रुपाली पाटील ठोंबरे यांची मुख्यमंत्र्यांकडे मागणी

मुंबई : महाराष्ट्रातील राजकारणात पुन्हा एकदा खळबळ माजवणारी मागणी समोर आली आहे. राष्ट्रवादी काँग्रेसच्या नेत्या आणि राज्य महिला आयोगाच्या माजी अध्यक्षा रुपाली चाकणकर यांच्यावर गंभीर आरोप करत, त्यांना महाराष्ट्रातील सर्वात मोठ्या 'सेक्स रॅकेट' प्रकरणातील मुख्य सूत्रधार म्हणून आरोपी करण्याची मागणी अँड. रुपाली पाटील ठोंबरे यांनी केली आहे. या संदर्भात त्यांनी राज्याचे मुख्यमंत्री आणि गृहमंत्री मा. देवेंद्र फडणवीस यांना एक सविस्तर पत्र लिहून आपली मागणी मांडली आहे. माजी नगरसेविका रुपाली पाटील ठोंबरे यांनी २१ मार्च २०२६ रोजी लिहिलेल्या या पत्रात अनेक गंभीर खुलासे केले आहेत.

पत्रातील मुख्य आरोप आणि मुद्दे :

रुपाली पाटील ठोंबरे यांनी आपल्या पत्रात दावा केला आहे की, 'भोंदूबाबा' कॅप्टन अशोक खरात यांच्याद्वारे चालवल्या जाणाऱ्या सेक्स रॅकेटमध्ये रुपाली चाकणकर यांचा प्रत्यक्ष सहभाग आहे. या संदर्भात त्यांनी खालील मुद्दे उपस्थित केले आहेत:

• पद आणि सत्तेचा दुरुपयोग : चाकणकर यांनी पुण्यासह अनेक ठिकाणी आपल्या पदाचा दुरुपयोग करून पोलिसांवर दबाव टाकला. या दबावापोटी खरात याला वाचवण्यासाठी बनावट गुन्हे दाखल करून मूळ गुन्ह्यावर पडदा टाकण्याचे प्रयत्न केल्याचा आरोप पत्रात आहे.
• मागील वर्षीचा कथित फोन कॉल : ठोंबरे यांच्या दाव्यानुसार, गेल्या वर्षी एका पत्रकाराने खरात यांच्या गैरकृत्यांचा पर्दाफाश केला होता. त्यावेळी रुपाली चाकणकर यांनी त्या पत्रकाराला फोन करून कारवाईची धमकी दिली होती आणि माफीनामा लिहायला लावला होता. याचा अर्थ चाकणकर यांना खरात यांच्या कृत्यांची आधीपासूनच माहिती होती, असा आरोप त्यांनी केला आहे.
• बनावट गुन्हा दाखल करण्याचा आरोप : २१/१२/२०२५ रोजी नाशिक ग्रामीणमधील वावी पोलीस स्टेशनमध्ये दाखल करण्यात आलेल्या एका गुन्ह्याचा (र. क्र. ४५८/२०२५) संदर्भ पत्रात दिला आहे. ठोंबरे यांच्या मते, हा गुन्हा रुपाली चाकणकर यांनीच मुद्दाम दाखल करायला लावला होता, जेणेकरून खरात यांच्यावर दाखल असलेल्या बलात्कार प्रकरणाची माहिती लपवून ठेवली जावी आणि त्यांना वाचवता यावे.
• दबावाचा वापर : शिर्डी पोलीस स्टेशनमध्ये फोन करून कॅप्टन खरात याला वाचवण्यासाठी दबाव आणला गेल्याचा दावाही पत्रात करण्यात आला आहे.

माजी नगरसेविका रुपाली पाटील ठोंबरे यांनी मुख्यमंत्र्यांना नम्र विनंती केली आहे की, या प्रकरणात रुपाली चाकणकर यांच्याविरोधात पुरेसे पुरावे उपलब्ध आहेत. त्यामुळे सत्यपरिस्थिती समोर आणण्यासाठी आणि पीडित महिलांना न्याय मिळवून देण्यासाठी रुपाली चाकणकर यांना तत्काळ अटक करण्यात यावी आणि या सेक्स रॅकेट प्रकरणाची सखोल चौकशी करण्यात यावी. या गंभीर आरोपांमुळे राज्यात खळबळ उडाली आहे. रुपाली चाकणकर यांच्यावर लावण्यात आलेले हे आरोप कितपत खरे आहेत आणि यावर राज्य सरकार काय कारवाई करणार, हे पाहणे महत्त्वाचे ठरणार आहे.