बारामती प्रतिनिधी : बारामती नगर परिषदेचे नगरसेवक किशोर मासाळ यांनी राज्याचे उपमुख्यमंत्री तथा राष्ट्रवादी काँग्रेस पक्षाचे वरिष्ठ नेते स्वर्गीय अजितदादा पवार यांच्याविषयी केलेल्या बेताल आणि आक्षेपार्ह वक्तव्यामुळे बारामतीच्या राजकीय वर्तुळात प्रचंड संतापाची लाट उसळली आहे. मासाळ यांच्या या वक्तव्याचा जाहीर निषेध करत, राष्ट्रवादी काँग्रेस पक्ष आणि सहयोगी पक्षाच्या बहुतांश सर्व नगरसेवक-नगरसेविकांनी एकत्र येत त्यांच्या नगरसेवक पदाच्या तातडीने राजीनाम्याची मागणी केली आहे. या संदर्भातील एक खळबळजनक आणि सामूहिक सह्यांचे जाहीर निवेदन आज सादर करण्यात आले, ज्यामुळे बारामतीमधील राजकीय वातावरण कमालीचे तापले आहे.
'सहयोग' निवासस्थानी नगरसेवकांची गर्दी; अजितदादांच्या प्रतिमेला अभिवादन...
या तीव्र राजकीय घडामोडींच्या पार्श्वभूमीवर बारामती नगर परिषदेच्या सर्व संतप्त नगरसेवकांनी एकत्र येत 'सहयोग' या निवासस्थानी धाव घेतली. सर्वप्रथम सर्व उपस्थित लोकप्रतिनिधींनी उपमुख्यमंत्री अजितदादा पवार यांच्या प्रतिमेस पुष्पहार अर्पण करून आणि पुष्प वाहून अत्यंत आदराने अभिवादन केले. अजितदादांवरील आपली निष्ठा आणि आदर किती दृढ आहे, हे सर्व नगरसेवकांनी यावेळी दाखवून दिले.
त्यानंतर, सर्व नगरसेवकांच्या सह्यांचे हे अधिकृत निवेदन आदरणीय सुनेत्रावहिनी पवार यांचे ओएसडी (विशेष कार्य अधिकारी) सचिन यादव यांच्याकडे सुपूर्द करण्यात आले. या निवेदनाद्वारे किशोर मासाळ यांच्यावर कडक कायदेशीर आणि राजकीय कारवाई करण्याची मागणी पक्षाच्या वरिष्ठ पातळीवर पोहोचवण्यात आली आहे.
दिग्गज लोकप्रतिनिधींची उपस्थिती आणि स्वाक्षऱ्यांचा धडाका
या निवेदनावर बारामती नगर परिषदेमधील जवळपास सर्वच प्रमुख आणि ज्येष्ठ पदाधिकाऱ्यांच्या स्वाक्षऱ्या आहेत. यामध्ये प्रामुख्याने नगराध्यक्ष: सचिन सातव, उपनगराध्यक्ष: श्वेता नाळे, गटनेते: संजय संघवी, उपगटनेते: संपदा चौधर, प्रतोद: विशाल हिंगणे, सभापती: अमर धुमाळ, नवनाथ बल्लाळ, जयसिंग देशमुख, सविता जाधव, मनीषा चव्हाण या सर्व प्रमुख पदाधिकाऱ्यांसह नगरसेवक जय पाटील, विष्णुपंत चौधर, बिरजू मांढरे, अभिजीत चव्हाण, अभिजीत जाधव, अविनाश निकाळजे, अनुप्रिता डांगे-तांबे, रुपाली मलगुंडे, प्रवीण माने, धनश्री बांदल, भारती शेळके, प्रसाद खारतोडे, पूनम चव्हाण, मनिषा बनकर, सारिका वाघमारे, मंगल किर्वे, मंगल जगताप, गोरख पारसे, शर्मिला ढवण, अल्ताफ सय्यद, अश्विनी सातव, राजेंद्र सोनवणे, प्रतिभा खरात, अफ्रिन बागवान, दर्शना तांबे, निलेश इंगुले, सोमनाथ गजाकस, अमोल कावळे, गणेश जोजारे आणि राहुल वाघोलीकर या सर्व नगरसेवकांनी या निवेदनावर स्वाक्षऱ्या करून किशोर मासाळ यांच्याविरोधात एल्गार पुकारला आहे.
"बारामतीकरांच्या भावना दुखावल्या"; लोकप्रतिनिधींचा आक्रमक पवित्रा
"अजितदादा पवार हे केवळ नेते नसून बारामतीच्या विकासाचा कणा आहेत. त्यांच्याविषयी करण्यात आलेले कोणतेही बेताल वक्तव्य बारामतीकरांच्या भावना दुखावणारे आहे. अशा प्रकारच्या अपमानास्पद आणि पातळी सोडलेल्या वक्तव्यांना बारामतीची जनता कधीही सहन करणार नाही आणि पाठिंबाही देणार नाही." — उपस्थित लोकप्रतिनिधींचे मत
नगरसेवकांनी पुढे म्हटले आहे की, ज्या नेत्याने बारामतीचा चेहरामोहरा बदलला, त्यांच्यावर अशी खालच्या पातळीवर जाऊन टीका करणे निषेधार्ह आहे. त्यामुळे संबंधित नगरसेवकाविरोधात पक्षाने आणि प्रशासनाने कठोर कारवाई करावी आणि त्यांचा नगरसेवक पदाचा राजीनामा तात्काळ लिहून घेण्यात यावा, अशी आग्रही मागणी या निवेदनाद्वारे करण्यात आली आहे.
निष्ठा कायम; मासाळ यांच्या अडचणी वाढणार?
या संपूर्ण प्रकारानंतर बारामतीमधील सर्व नगरसेवकांनी एकमुखाने आणि एकजुटीने किशोर मासाळ यांच्या वक्तव्याचा निषेध नोंदवला. "नेते येतील आणि जातील, पण अजितदादांविषयी आमचा आदर, प्रेम आणि निष्ठा कायम राहील," अशी भावना सर्वांनी जाहीरपणे व्यक्त केली. सर्व नगरसेवकांनी एकत्र येत घेतलेल्या या आक्रमक भूमिकेमुळे आता किशोर मासाळ यांच्या अडचणीत मोठी वाढ होण्याची शक्यता निर्माण झाली असून, पक्षाचे वरिष्ठ नेतृत्व यावर काय निर्णय घेणार, याकडे संपूर्ण तालुक्याचे लक्ष लागले आहे.
Post a Comment